據講係最招積既車仔麵檔
第764飲食男女介紹左三間最招積既車仔麵檔。
第一間 – 只准揀四樣餸！
第二間 – 揀餸慢一點，會俾老細鬧「太咪摩」
第三間 – 冇得揀位坐！
我想引述一下飲食男女記者所講既第一同第三間既招呼客人的方式。
第一間 -
記者問點解只可以揀四樣餸，老細話:「嗌咁多餸做乜？揀又揀耐啲，食又食慢啲，阻住晒其他人幫襯，阻住我做多單生意！想食多啲咪大雜麵囉，有六款餸，不過啲餸 set死咗，唔可以轉 o架，再唔係咪嗌多碗囉，不過落單嗰陣早單聲呀，唔好食完先至嗌，唔係我哋唔接單 o架！」
儘管多多規矩，但客人從來不敢有半句怨言，因為食物實在做得出色。尤其是滷水雞翼尖，那朕滷水香隔幾個鋪位都聞到。
第三間 -
客人不多時，老闆更與熟客有講有笑，不過，客一多，就反臉！而且訂立一條非常不人道的規矩，不理男女老少，通通不准揀位坐，一切都要聽從店員安排，不得有異議，否則不做你生意！站在麵檔旁的店員，待客人排隊揀完餸，立即就會將麵捧走，麵放在那張枱那個位，客人就要坐那張枱那個位，於是有母子被迫分離，情侶被迫各散東西。
「我咁做都係為大局着想，唔鍾意咪走囉！以前任佢哋揀位，結果有人爭位，有人霸位，有次仲先則口角繼而動武呀！
搞到要報警，咁麻煩，咪索性一刀切，個個唔准揀位囉，連熟客都冇面俾 o架，費事一陣間又話我厚此薄彼，又出事就麻煩！」老闆直說。
據講三間D 生意都多到死。我相信我呢世都唔會幫趁呢三間野，但我好唔明點解咁多香港人犯賤鍾意幫趁埋呢咁既食店。莫非一樣傳聞中好食既野，真係值得俾人串， 俾人問候 再由背脊骨落真係咁好味D?
我覺得一間野好食與否是要包括環境，服務，用料，質素等等各樣因素。反而單單係食物好食而服務勁差的話個樣野會變成好難食。
舉個例: 你阿媽/外母 煮D餸好好食，有一日，你食飯既時候你同爸爸/兄弟/外父嗌交，又或者你阿媽/外母餐餐煮完都口黑面黑，同你講: 死XX, 返黎食飯做乜? 又要你阿媽/外母我忙餐死既煮俾你食。
你會有咩感覺?
出去食飯要受氣，我情願煮公仔麵+腸旦啦。
多謝飲食男女話左三間黑店俾我知。
80年代長大的 30mething
愛音樂，愛攝影，愛旅遊，愛老婆同阿仔，愛狗
嗜好包括： 音樂，攝影，日本旅遊 同飲飲食食
網站：http://www.flickr.com/photos/ronwho/
http://www.ronwho.com/wordpress/
http://www.facebook.com/ronwho
